12 avqust 2024-cü il tarixdə Dövlət Məşğulluq Agentliyinin xətti ilə “Data analitik (big data analitikləri)” peşəsi üzrə hazırlıq kurslarına cəlb edilmiş iştirakçılar arasında Handex Tədris Mərkəzi tərəfindən "Sirli Xəzinə" adlı yarış keçirilmişdir. 25 nəfər müdavim arasında keçirilən bu yarışda Azərbaycan Respublikası Əmək və Əhalinin Sosial Müdafiəsi Nazirliyi Dövlət Məşğulluq Agentliyinin Peşə hazırlığı departamentinin nümayəndəsi Anar Əhmədzadə də iştirak etmişdir.
Tədbiri Handex Tədris Mərkəzinin rəhbəri Rəşad Qurbanov açaraq Dövlət Məşğulluq Agentliyinin xətti ilə “Data analitik (big data analitikləri)” peşəsi üzrə hazırlığa cəlb edilmiş müdavimlərin inkişafı üçün görülən işlərdən və onların uğurlarından bəhs etdi. Belə ki, 3 illik əməkdaşlıq çərçivəsində Handex Tədris Mərkəzində peşə hazırlığını bitirən müdavimlərin 85,4%-işlə təmin edilmişdir. Azərbaycanın əmək bazarına görə əməkhaqqı göstəricilərinin də kifayət qədər yaxşı olması diqqətdən qaçmır. İşlə təmin olunan müdavimlərin ilk vəzifələrində orta əməkhaqqısı 833 AZN, maksimum əməkhaqqısı isə 1800 AZN təşkil edib, cari vəzifələrində isə orta əməkhaqqı 1051 AZN, maksimum əməkhaqqı isə 2500 AZN-dir.
Daha sonra çıxış üçün söz Dövlət Məşğulluq Agentliyinin Peşə hazırlığı departamentinin nümayəndəsi Anar Əhmədzadəyə verildi. Anar bəy çıxışında “Peşə hazırlığı”nın məqsədi haqqında ətraflı məlumat verərək iştirakçılara gələcək karyeralarında və yarışda uğurlar arzuladı.
Daha sonra isə 25 nəfər iştirakçı Captain Jack Sparrow, Nathan Drake, Indiana Jones və Lara Croft komandaları şəklində mübarizəyə başladı. Komandaların adları yarışın adına uyğun olaraq daima xəzinə axtarışında olan personajlardan götürülmüşdür. Yarışda qalib olmaq və Sirli Xəzinəni əldə etmək üçün komandalar peşələrinə uyğun (Data analitik) verilmiş tapşırıqları birinci yerinə yetirməli idilər. Onların işlərini çətinləşdirən məqam isə yarışın qaydaları idi. Belə ki, tapşırığı yerinə yetirməyə başlamaq üçün açarlara ehtiyac var idi, bu açarlar isə pazllarda və ya digər tapşırıqlarda gizli idi. Güvən, inam, komanda ruhu, mübarizə, sürət, səriştə və bilik tələb edən bu yarışın əsas məqsədi iştirakçılar arasında komanda ilə işləmə bacarığını artırmaq idi.
Rəqabətin hədsiz çox olduğu bu mübarizədə Indiana Jones komandası qalib gələrək “Sirli Xəzinə”ni qazandı. Komanda iştirakçılarının adlarını qeyd edirik:
Əvəz Əlili (kapitan), Ziya Hacıyev, Sofya Fətəliyeva, Elvin Nəcəfli, Lalə Cəfərova, Günay Kərimova
Sonda qaliblərə sertifat və qiymətli hədiyyələr təqdim edilərək xatirə şəkilləri çəkildi.
